Ландо Норис со Мекларен ја освои пол-позицијата за Големата награда на Бразил во Формула 1, по драматичните квалификации на дождливата патека „Интерлагос“ во Сао Паоло. Новиот светски шампион Кими Антонели со Мерцедес ќе стартува од второто место на утрешната трка, која започнува во 18 часот по македонско време.
Силниот дожд предизвика долги прекини на квалификациите, кои траеја околу два и пол часа. Во тешките услови најдобро се снајде Норис, кој со време од 1:27.470 минути ја освои третата последователна пол-позиција на „Интерлагос“.
Второто најбрзо време го постави Џорџ Расел со Мерцедес, со заостанување од 204 илјадитинки, додека неговиот тимски колега Кими Антонели беше трет со време од 1:28.095 минути. Сепак, поради казната од пет стартни позиции за Расел, Антонели ќе стартува од првиот ред, веднаш до Норис.
Квалификациите ги одбележаа и бројните казни за промена на компоненти на погонските единици. Шарл Леклер, кој го освои четвртото место, доби казна од десет позиции, додека Макс Верстапен и Луис Хамилтон ќе стартуваат од задниот дел на поредокот.
Особено драматично беше во вториот квалификациски сегмент, кога излетувањето на бразилскиот дебитант Рафаел Камара предизвика црвено знаме и го прекина обидот на повеќе возачи да ги подобрат своите времиња. Меѓу елиминираните беше и Оскар Пјастри од Мекларен.
Од казните профитираше и Лијам Лосон, кој ќе стартува трет, додека Нико Хилкенберг со Ауди ќе биде четврти.
Антонели ја продолжува шампионската сезона
Во Бразил, Кими Антонели пристигна како нов светски шампион во Формула 1, откако минатиот викенд во Мексико, со третото место, математички ја обезбеди својата прва титула.
Дваесетгодишниот Италијанец стана најмладиот светски шампион во историјата на Формула 1, соборувајќи го рекордот на Себастијан Фетел, и првиот Италијанец со шампионска титула по Алберто Аскари во 1953 година.
Иако титулата кај возачите е решена, во Бразил продолжува борбата за преостанатите позиции во генералниот пласман, како и за шампионатот кај конструкторите. Мерцедес има можност уште овој викенд да ја обезбеди и конструкторската титула.
Главната трка за Големата награда на Сао Паоло ќе се вози во недела, 8 ноември, со почеток во 18 часот по македонско време.
На патеката „Интерлагос“, долга 4,309 километри, возачите ќе извозат 71 круг, односно вкупно 305,879 километри.
OhridNews
