21.50 Од утре, недела, 22 март, државата започнува со ограничување на движењето на сите граѓани – полициски час, објави во вонредното обраќање до нацијата премиерот Оливер Спасовски.

Се забранува движење на населението во периодот од 21 до 06 часот секој ден!– информираше Спасовски.

Тој рече дека ваква радикална мерка, која за прв пат се воведува на територијата на целата држава, се носи за да се заштити населениото. Веќе ништо не е исто. Животот радикално се промени, како кај нас, така и во целиот свет. Таа ситуација бара од нас исто такво радикално менување на нашето секојдневие. Затоа ја донесовме оваа мерка, додаде Спасовски.

Ако сакаме да си ја заштитиме нацијата сите мораме да се однесуваме и вонредно и одговорно. За опстанокот на нашите граѓани и нашиот економски систем се работи. Мора најригорозно да ги почитуваме мерките, ако го направиме тоа, ќе ја совладаме заканата и заедно ќе излеземе посилни. – истакна премиерот Спасовски.

Мерките нема да важат за службите вклучени во справувањето со коронавирусот како полицијата армијата, противпожарната служба. Движење ќе биде дозволено само за итни медицински случаи со придружба на болното лице од најмногу две лица, со строга проверка на целта на движењето и потврда за истото од здравствена установа, појасни Спасовски.

Тој им упати јавна благодарност на сите што се во првите редови во борбата со пандемијата, здравствените работници, полицајците, припадниците на армијата, и другите служби, како и на професионалните медиуми, за, како што рече, одговорното и навремено известување за ситуацијата.

Потребно е секој од нас да се прилагоди на оваа крајно загрижувачка ситуација и да преземе максимално одговорно однесување. – рече Спасовски.

МЕРКИ НА ВЛАДАТА ЗА СПРЕЧУВАЊЕ НА ШИРЕЊЕ НА КОРОНАВИРУСОТ

1. Да се забрани движење на населението во Република Северна Македонија во временски период од 21:00 – 06:00, а со цел спречување на ширење на заразната болест COVID-19 и заштита на населението во Република Северна Македонија.

• Од оваа забрана се исклучуваат лица кои имаат потреба од итна медицинска помош / животно загрозувачка состојба/лица на дијализа, исклучиво во придружба на најмногу две лица.

• Доколку поради итноста на здравствената состојба возилото биде запрено од полициска контрола, дополнително ќе се евидентира и ќе се провери оправданоста на излегувањето и превозот до здравствената институција, преку приложување на медицинската документација по завршување на медицинскиот преглед. Ова е усогласен став со Министерство за внатрешни работи и е оперативно изводливо.

• Директорите на јавно здравствените установи ќе изготват список на вработени лица за кои се предвидува дека ќе имаат неопходна потреба за движење вон лимитираното време и ќе го дистрибуираат до Министерство за внатрешни работи или друго Министерство/Установа, со цел изготвување на специјални пропусници/легитимации, за лицата кои ќе можат да се движат вон рестриктивните часови. Со тоа Министерство за внатрешни работи да има комплетен увид за временскиот период кога овие лица ќе се движат.

• Во контекст на постоечките рестрикции за движење не се опфатени припадниците на Министерство за внатрешни работи, Армија на Република Северна Македонија, противпожарните екипи, лицата вработени во комунална хигиена, кои се во моментот на работа во смена.

• Да се ограничи бројот на дежурните аптеки на територијата на градовите и да се назначат од Министерството за здравство или Агенцијата за лекови-МАЛМЕД или Фондот за здравствено осигурување на Република Северна Македонија, одреден број на аптеки, кои ќе дежураат во рестриктивниот период, а во исто време да бидат локациски поврзани со дежурните здравствени институции. Пристапот до дежурните аптеки ќе се ограничи само на лица кои извршиле медицински преглед во здравствена установа, а како доказ за тоа ќе приложат медицински извештај од извршен преглед.

• Да се задолжат такси компаниите да воведат дежурства со ограничен број на возила и истите да бидат искористени исклучиво за превоз кон/од болничка установа или аптека. Таксистите задолжително да користат лична заштитна опрема во возилото (заштитна маска и ракавици).

2. Се забранува движење на возила од јавен превоз од 21:00 до 06:00.

3. Дежурни екипи на ЕВН, Водовод и канализација, Телекомуникации служби, топлификација смеат да се движат само по претходна најава на 192 (МВР).

4. Да се организира меѓуградскиот и јавниот превоз со ограничување на капацитетот за превоз на патници за 50% во возилото, или со задолжително одржување на растојание од најмалку два метри меѓу патниците.

5. Се забранува собирање на населението во групи поголеми од 5 (пет) лица во период од 06:00 – 21:00 на јавни места и површини.

Тоа го имавме како одлука, и сега го потврдуваме и на овој начин.

6. Директорите/управителите на погони/фабрики на сите институции се задолжуваат да го прилагодат своето работно време и производството согласно забраната за движење во предвидениот период.

7. Во трговските објекти, аптеки и јавни установи кои даваат услуги за населението каде плаќањето и работата се одвива на каси или шалтери, да се ограничи присуството на граѓаните согласно бројот на каси односно шалтери (колку каси/шалтери толку граѓани во исто време), односно врз основа на големината на објектот. Времетраењето на задржување во овие објекти го ограничуваат и одредуваат менаџерите на објектите.

Премиерот на вонредно обраќање најави воведување полициски час во земјата

Г.М.