Поради големите загуби и слабата искористенот на капацитетите, Министерството за здравство реши да и` стави клуч на Специјалната детска болница во населбата Свети Стефан во Охрид.  Оваа јавна здравствена установа која годинава одбележува јубилеј 40 години од постоењето  повеќе од 15 години работи со милионски  загуби кои се покриваат од Фондот за здравство, кој само минатата година морал да покрие „дупка“ во финансиското работење на болницата од 16 милиони денари.


Не работи рентабилно. Специјална детска болница

„Со рационализацијата во здравството се предвидува ново буџетирање на јавните здравствени организации од наредната година кои ќе се финансираат со средствата од услугите услугите кои ги извршуваат, што значи дека Специјалната детска болница нема да може да опстои бидејќи болницата не работи рентабилно“, вели д-р Снежана Стефаноска, директор на Специјална детска болница – Охрид.

„Болницата ќе се трансформира, а дејноста ќе се интегрира  во склоп на  специјалната болница за ортопедија и трауматологија “Св. Еразмо“ каде што постои одделение за церебрална парализа. Бидејќи поголемиот број од лекувани деца кај нас се со истата дијагноза, значи ќе можеме да се интегрираме на тоа одделение како поголема работна единица, па и да прифатиме и деца со други заболувања кои што би можеле да се рехабилитираат таму“, додава Стефаноска.

Ниту еден од 67-те вработени во Специјалната детска болница нема да остане на улица, вели Стефаноска. Таа не` информираше дека претставници на Министерството за здравство изминативе денови ја посетиле Специјалната детска болница, при што било договорено вработените да се прераспределат во јавните здравствени установи во Охрид и Струга според нивните потреби.

Во моментов во Специјалната детска болница во Охрид престојуваат 30 деца со нивните родители. Болницата лани работеше со 30-35% искористеност на капацитетот од 100 легла, рече д-р Стефаноска. Причините за намалувањето на бројот на децата кои доаѓаат во Охрид таа ги гледа во намалениот пазар по распадот на Југославија, отворањето на голем број физијатарски амбуланти во земјава, новиот начин на упатување на децата во Специјалната болница во Охрид и воведената партиципација за престој.


Според најавите на местото на специјалната детска болница која располага со над 10.000 метри квадратни атрактивен простор на брегот на Охридското Езеро во населбата Св. Стефан,  најверојатно ќе се гради луксузен хотел, а постои заинтересираност и за изградба на клиника за рехабилитација или пензионерски дом.

Г. Момироски
Фото: С. Костоски